ਅਕਸ਼ੈ ਕੁਮਾਰ ਦੀ ਟ੍ਰੋਲਿੰਗ ‘ਤੇ ਅਜੇ ਦੇਵਗਨ ਦੀ ਪ੍ਰਤੀਕਿਰਿਆ, ਤੰਬਾਕੂ ਦੇ ਵਿਗਿਆਪਨ ‘ਤੇ ਕਿਹਾ- ਹਰ ਕੋਈ ਇੰਨਾ ਸਮਝਦਾਰ ਹੈ…

ਬਾਲੀਵੁੱਡ ਅਭਿਨੇਤਾ ਅਕਸ਼ੈ ਕੁਮਾਰ ਸੋਸ਼ਲ ਮੀਡੀਆ ‘ਤੇ ਆਪਣੇ ਇਕ ਇਸ਼ਤਿਹਾਰ ਕਰਕੇ ਕਾਫ਼ੀ ਚਰਚਾ ‘ਚ ਹਨ। ਪਹਿਲੀ ਵਾਰ ਅਕਸ਼ੈ ਕੁਮਾਰ ਸ਼ਾਹਰੁਖ ਖਾਨ ਅਤੇ ਅਜੇ ਦੇਵਗਨ ਦੇ ਨਾਲ ਤੰਬਾਕੂ ਬ੍ਰਾਂਡ ਵਿਮਲ ਦੇ ਵਿਗਿਆਪਨ ਵਿੱਚ ਨਜ਼ਰ ਆਏ। ਤਿੰਨੋਂ ਸੁਪਰਸਟਾਰਾਂ ਨੂੰ ਇਕ ਫਰੇਮ ‘ਚ ਦਿਖਾਉਣ ਵਾਲਾ ਇਹ ਵਿਗਿਆਪਨ ਨਾ ਸਿਰਫ ਵਾਇਰਲ ਹੋਇਆ, ਸਗੋਂ ਇਸ ਦੀ ਕਾਫੀ ਟ੍ਰੋਲਿੰਗ ਵੀ ਹੋਈ। ਤਿੰਨਾਂ ਸਿਤਾਰਿਆਂ ‘ਚੋਂ ਸਭ ਤੋਂ ਵੱਡਾ ਵਿਵਾਦ ਅਕਸ਼ੈ ਕੁਮਾਰ ਨੂੰ ਲੈ ਕੇ ਹੋਇਆ ਹੈ। ਤੰਬਾਕੂ ਬ੍ਰਾਂਡ ਨਾਲ ਜੁੜੇ ਹੋਣ ਕਾਰਨ ਅਕਸ਼ੈ ਕੁਮਾਰ ਨੂੰ ਜ਼ਬਰਦਸਤ ਟ੍ਰੋਲਿੰਗ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਜਿਸਨੂੰ ਦੇਖ ਅਕਸ਼ੇ ਕੁਮਾਰ ਨੇ ਮੁਆਫੀ ਵੀ ਮੰਗ ਲਈ ਹੈ। ਪਰ ਫਿਰ ਵੀ ਸਥਿਤੀ ਅਕਸ਼ੈ ਕੁਮਾਰ ਦੇ ਪੱਖ ‘ਚ ਨਜ਼ਰ ਨਹੀਂ ਆ ਰਹੀ ਹੈ। ਹੁਣ ਅਜੇ ਦੇਵਗਨ ਨੇ ਅਕਸ਼ੈ ਕੁਮਾਰ ਦੀ ਆਲੋਚਨਾ ‘ਤੇ ਪ੍ਰਤੀਕਿਰਿਆ ਦਿੱਤੀ ਹੈ। ਇਕ ਮੀਡੀਆ ਪੋਰਟਲ ਨਾਲ ਗੱਲਬਾਤ ਕਰਦੇ ਹੋਏ ਅਜੇ ਦੇਵਗਨ ਨੇ ਕਿਹਾ ਕਿ ਕਿਸੇ ਚੀਜ਼ ਦਾ ਸਮਰਥਨ ਕਰਨਾ ਨਿੱਜੀ ਪਸੰਦ ਹੈ। ਹਰ ਕੋਈ ਆਪਣੇ ਲਈ ਫੈਸਲੇ ਲੈਣ ਲਈ ਕਾਫੀ ਸਿਆਣਾ ਹੈ। ਕੁਝ ਉਤਪਾਦ ਅਜਿਹੇ ਹਨ ਜੋ ਨੁਕਸਾਨਦੇਹ ਹਨ ਅਤੇ ਕੁਝ ਅਜਿਹੇ ਹਨ ਜੋ ਨੁਕਸਾਨਦੇਹ ਨਹੀਂ ਹਨ। ਮੈਂ ਇਹ ਉਸ ਦਾ ਨਾਂ ਲਏ ਬਿਨਾਂ ਕਹਾਂਗਾ ਕਿਉਂਕਿ ਮੈਂ ਉਸ ਦਾ ਪ੍ਰਚਾਰ ਨਹੀਂ ਕਰਨਾ ਚਾਹੁੰਦਾ। ਮੈਂ ਇਲਾਇਚੀ ਕਰ ਰਿਹਾ ਹਾਂ। ਮੈਨੂੰ ਲੱਗਦਾ ਹੈ ਕਿ ਇਸ਼ਤਿਹਾਰਬਾਜ਼ੀ ਤੋਂ ਵੱਧ, ਜੇਕਰ ਕੁਝ ਗਲਤ ਹੈ ਤਾਂ ਉਨ੍ਹਾਂ ਨੂੰ ਵੇਚਿਆ ਨਹੀਂ ਜਾਣਾ ਚਾਹੀਦਾ।

ਬਾਲੀਵੁੱਡ ਦੇ ਖਿਲਾੜੀ ਕੁਮਾਰ ਨੇ ਵਿਮਲ ਇਲੈਚੀ ਦੀ ਮਸ਼ਹੂਰੀ ਕਰਕੇ ਆਪਣੇ ਆਪ ਨੂੰ ਵੱਡੀ ਮੁਸੀਬਤ ਵਿੱਚ ਪਾ ਲਿਆ ਹੈ। ਅਕਸ਼ੈ ਕੁਮਾਰ ਨੇ ਵੀਰਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਆਪਣੀ ਮੁਆਫੀ ਸਾਂਝੀ ਕੀਤੀ। ਜਿਸ ‘ਚ ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਆਪਣੇ ਪ੍ਰਸ਼ੰਸਕਾਂ ਤੋਂ ਮੁਆਫੀ ਮੰਗੀ। ਅਦਾਕਾਰ ਨੇ ਖੁਦ ਨੂੰ ਤੰਬਾਕੂ ਬ੍ਰਾਂਡ ਤੋਂ ਦੂਰੀ ਬਣਾਉਣ ਦਾ ਫੈਸਲਾ ਦੱਸਿਆ। ਅਕਸ਼ੈ ਕੁਮਾਰ ਨੇ ਕਿਹਾ ਕਿ ਉਹ ਵਿਗਿਆਪਨ ਲਈ ਮਿਲੀ ਫੀਸ ਦਾਨ ਕਰਨਗੇ। ਅਭਿਨੇਤਾ ਨੇ ਪ੍ਰਸ਼ੰਸਕਾਂ ਨੂੰ ਵਾਅਦਾ ਕੀਤਾ ਕਿ ਉਹ ਅਗੋਂ ਤੋਂ ਬਹੁਤ ਸੋਚ-ਸਮਝ ਕੇ ਵਿਕਲਪਾਂ ਦੀ ਚੋਣ ਕਰਨਗੇ।