ਜਨਰਲ ਮਨੋਜ ਪਾਂਡੇ ਹੋਣਗੇ ਅਗਲੇ ਆਰਮੀ ਚੀਫ, ਥਲ ਸੈਨਾ ਮੁਖੀ ਵਜੋਂ ਨਿਯੁਕਤ ਹੋਣ ਵਾਲੇ ਪਹਿਲੇ ਇੰਜੀਨੀਅਰ ਬਣੇ

ਲੈਫਟੀਨੈਂਟ ਜਨਰਲ ਮਨੋਜ ਪਾਂਡੇ ਨੂੰ ਭਾਰਤੀ ਫੌਜ ਦਾ ਅਗਲਾ ਮੁਖੀ ਨਿਯੁਕਤ ਕੀਤਾ ਗਿਆ ਹੈ। 29ਵੇਂ ਥਲ ਸੈਨਾ ਮੁਖੀ ਜਨਰਲ ਮਨੋਜ ਮੁਕੁੰਦ ਨਰਵਾਣੇ ਦੀ ਥਾਂ ਲੈ ਕੇ ਆਰਮੀ ਸਟਾਫ਼ ਦੇ ਮੁਖੀ ਬਣਨ ਵਾਲੇ ਇੰਜਨੀਅਰਜ਼ ਕੋਰ ਦੇ ਪਹਿਲੇ ਅਧਿਕਾਰੀ ਹੋਣਗੇ ਜੋ 30 ਅਪ੍ਰੈਲ ਨੂੰ ਆਪਣਾ 28 ਮਹੀਨਿਆਂ ਦਾ ਕਾਰਜਕਾਲ ਪੂਰਾ ਕਰਨ ਜਾ ਰਹੇ ਹਨ।

ਨੈਸ਼ਨਲ ਡਿਫੈਂਸ ਅਕੈਡਮੀ ਦੇ ਸਾਬਕਾ ਵਿਦਿਆਰਥੀ ਪਾਂਡੇ ਨੂੰ ਦਸੰਬਰ 1982 ਵਿੱਚ ਕੋਰ ਆਫ਼ ਇੰਜੀਨੀਅਰਜ਼ ਵਿੱਚ ਸ਼ਾਮਲ ਕੀਤਾ ਗਿਆ ਸੀ। ਲੈਫਟੀਨੈਂਟ ਜਨਰਲ ਮਨੋਜ ਪਾਂਡੇ ਨੇ ਜੰਮੂ ਅਤੇ ਕਸ਼ਮੀਰ ਵਿੱਚ ਕੰਟਰੋਲ ਰੇਖਾ ਦੇ ਨਾਲ ਪੱਲਣਵਾਲਾ ਸੈਕਟਰ ਵਿੱਚ ਆਪ੍ਰੇਸ਼ਨ ‘ਪਰਾਕਰਮ’ ਦੌਰਾਨ ਇੱਕ ਇੰਜੀਨੀਅਰ ਰੈਜੀਮੈਂਟ ਦੀ ਕਮਾਂਡ ਸੰਭਾਲੀ ਸੀ।

ਆਪ੍ਰੇਸ਼ਨ ‘ਪਰਾਕਰਮ’, ਪੱਛਮੀ ਸਰਹੱਦ ‘ਤੇ ਸੈਨਿਕਾਂ ਅਤੇ ਹਥਿਆਰਾਂ ਦੀ ਵੱਡੇ ਪੱਧਰ ‘ਤੇ ਲਾਮਬੰਦੀ, ਦਸੰਬਰ 2001 ਦੇ ਸੰਸਦ ‘ਤੇ ਹੋਏ ਅੱਤਵਾਦੀ ਹਮਲੇ ਦੇ ਬਾਅਦ ਹੋਈ, ਜਿਸ ਨੇ ਭਾਰਤ ਅਤੇ ਪਾਕਿਸਤਾਨ ਨੂੰ ਯੁੱਧ ਦੇ ਕੰਢੇ ‘ਤੇ ਲਿਆ ਦਿੱਤਾ।

ਆਪਣੇ 39 ਸਾਲ ਦੇ ਫੌਜੀ ਕੈਰੀਅਰ ਵਿਚ ਲੈਫਟੀਨੈਂਟ ਜਨਰਲ ਪਾਂਡੇ ਨੇ ਪੱਛਮੀ ਥੀਏਟਰ ਵਿਚ ਇਕ ਇੰਜੀਨੀਅਰ ਬ੍ਰਿਗੇਡ, ਐੱਲਓਸੀ ‘ਤੇ ਇੱਕ ਪੈਦਲ ਸੈਨਾ ਬ੍ਰਿਗੇਡ, ਲੱਦਾਖ ਸੈਕਟਰ ‘ਚ ਇੱਕ ਪਰਬਤੀ ਡਵੀਜ਼ਨ ਤੇ ਉੱਤਰ-ਪੂਰਬ ਵਿਚ ਇੱਕ ਕੋਰ ਦੀ ਕਮਾਨ ਸੰਭਾਲੀ ਹੈ। ਪੂਰਬੀ ਕਮਾਨ ਦਾ ਕਾਰਜਕਾਰ ਸੰਭਾਲਣ ਤੋਂ ਪਹਿਲਾਂ ਉਹ ਅੰਡੇਮਾਨ ਨਿਕੋਬਾਰ ਕਮਾਨ ਦੇ ਕਮਾਂਡਰ ਇਨ ਚੀਫ ਸੀ।