ਏਅਰ ਇੰਡੀਆ ਨੂੰ ਖਰੀਦਣ ਤੋਂ ਬਾਅਦ ਟਾਟਾ ਦੇਸ਼ ਦੀ ਦੂਜੀ ਸਭ ਤੋਂ ਵੱਡੀ ਏਅਰਲਾਈਨ ਬਣ ਜਾਵੇਗੀ। ਏਅਰ ਇੰਡੀਆ ਨੂੰ ਹੈਂਡ ਓਵਰ ਤੋਂ ਪਹਿਲਾਂ ਟਾਟਾ ਸੰਨਜ਼ ਦੇ ਚੇਅਰਮੈਨ ਪੀਐਮ ਮੋਦੀ ਨਾਲ ਮੁਲਾਕਾਤ ਕਰਨਗੇ। ਦੱਸ ਦੇਈਏ ਕਿ ਏਅਰ ਇੰਡੀਆ ਕੋਲ ਘਰੇਲੂ ਅਤੇ ਅੰਤਰਰਾਸ਼ਟਰੀ ਰੂਟਾਂ ‘ਤੇ ਕਈ ਮਹੱਤਵਪੂਰਨ ਉਡਾਣਾਂ ਹਨ। ਅਜਿਹੇ ‘ਚ ਕਿਹਾ ਜਾ ਸਕਦਾ ਹੈ ਕਿ ਨਵੇਂ ਪ੍ਰਬੰਧਨ ਨਾਲ ਘਰੇਲੂ ਅਤੇ ਅੰਤਰਰਾਸ਼ਟਰੀ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਬਿਹਤਰ ਸੁਵਿਧਾਵਾਂ ਮਿਲ ਸਕਦੀਆਂ ਹਨ।
ਟਾਟਾ ਗਰੁੱਪ ਨੇ ਕਿਹਾ ਹੈ ਕਿ ਸ਼ੁਰੂਆਤ ‘ਚ ਉਹ 5 ਫਲਾਈਟਾਂ ‘ਤੇ ਮੁਫਤ ਖਾਣਾ ਮੁਹੱਈਆ ਕਰਵਾਏਗਾ। ਹਾਲਾਂਕਿ, ਏਅਰ ਇੰਡੀਆ ਫਿਲਹਾਲ ਟਾਟਾ ਗਰੁੱਪ ਦੇ ਬੈਨਰ ਹੇਠ ਉਡਾਣ ਨਹੀਂ ਭਰੇਗੀ। ਜਿਨ੍ਹਾਂ ਉਡਾਣਾਂ ਵਿੱਚ ਮੁਫਤ ਭੋਜਨ ਉਪਲਬਧ ਹੋਵੇਗਾ, ਉਨ੍ਹਾਂ ਵਿੱਚ ਮੁੰਬਈ-ਦਿੱਲੀ ਦੀਆਂ ਦੋ ਉਡਾਣਾਂ AI864 ਅਤੇ AI687, AI945 ਮੁੰਬਈ ਤੋਂ ਅਬੂ ਧਾਬੀ ਅਤੇ AI639 ਮੁੰਬਈ ਤੋਂ ਬੈਂਗਲੁਰੂ ਸ਼ਾਮਿਲ ਹਨ। ਇਸ ਤੋਂ ਇਲਾਵਾ ਮੁੰਬਈ-ਨਿਊਯਾਰਕ ਰੂਟ ‘ਤੇ ਚੱਲਣ ਵਾਲੀ ਫਲਾਈਟ ‘ਚ ਵੀ ਮੁਫਤ ਖਾਣਾ ਮਿਲੇਗਾ। ਟਾਟਾ ਗਰੁੱਪ ਨੇ ਕਿਹਾ ਕਿ ਬਾਅਦ ਵਿੱਚ ਮੁਫ਼ਤ ਭੋਜਨ ਵਿੱਚ ਪੜਾਅਵਾਰ ਵਾਧਾ ਕੀਤਾ ਜਾਵੇਗਾ।
ਏਅਰ ਇੰਡੀਆ ਦੇ ਇਤਿਹਾਸ ਦੀ ਗੱਲ ਕਰੀਏ ਤਾਂ ਇਸਦੀ ਸ਼ੁਰੂਆਤ ਅਪ੍ਰੈਲ 1932 ਵਿੱਚ ਹੋਈ ਸੀ। ਇਸਦੀ ਸਥਾਪਨਾ ਉਦਯੋਗਪਤੀ JRD ਟਾਟਾ ਦੁਆਰਾ ਕੀਤੀ ਗਈ ਸੀ। ਉਸ ਸਮੇਂ ਇਸ ਦਾ ਨਾਂ ਟਾਟਾ ਏਅਰਲਾਈਨਜ਼ ਸੀ। ਜੇਆਰਡੀ ਟਾਟਾ ਨੇ ਪਹਿਲੀ ਵਾਰ 1919 ਵਿੱਚ ਸਿਰਫ 15 ਸਾਲ ਦੀ ਉਮਰ ਵਿੱਚ ਇੱਕ ਸ਼ੌਕ ਵਜੋਂ ਹਵਾਈ ਜਹਾਜ਼ ਉਡਾਇਆ, ਪਰ ਇਹ ਸ਼ੌਕ ਜਨੂੰਨ ਬਣ ਗਿਆ ਅਤੇ ਜੇਆਰਡੀ ਟਾਟਾ ਨੇ ਪਾਇਲਟ ਦਾ ਲਾਇਸੈਂਸ ਲੈ ਲਿਆ। ਏਅਰਲਾਈਨ ਦੀ ਪਹਿਲੀ ਵਪਾਰਕ ਉਡਾਣ ਨੇ 15 ਅਕਤੂਬਰ 1932 ਨੂੰ ਉਡਾਣ ਭਰੀ ਸੀ। ਇਸ ਤੋਂ ਬਾਅਦ ਸਾਲ 1933 ਵਿੱਚ ਟਾਟਾ ਏਅਰਲਾਈਨਜ਼ ਨੇ ਯਾਤਰੀਆਂ ਨਾਲ ਪਹਿਲੀ ਉਡਾਣ ਭਰੀ ਸੀ।