KL ਰਾਹੁਲ ਹੋਣਗੇ ਲਖਨਊ ਦੇ ਕਪਤਾਨ, ਪੰਜਾਬ ਦੇ ਇਸ ਸਟਾਰ ਖਿਡਾਰੀ ਨਾਲ ਵੀ ਹੋਇਆ ਕਰਾਰ

ਪ੍ਰਸ਼ੰਸਕਾਂ ਦੇ ਨਾਲ-ਨਾਲ ਟੀਮਾਂ ਵੀ ਇੰਡੀਅਨ ਪ੍ਰੀਮੀਅਰ ਲੀਗ 2022 (IPL 2022) ਦੀ ਮੇਗਾ ਨਿਲਾਮੀ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੀਆਂ ਹਨ। ਮੇਗਾ ਨਿਲਾਮੀ ਤੋਂ ਪਹਿਲਾਂ, ਦੋ ਨਵੀਆਂ ਟੀਮਾਂ ਅਹਿਮਦਾਬਾਦ ਅਤੇ ਲਖਨਊ ਫ੍ਰੈਂਚਾਇਜ਼ੀ ਨੇ ਤਿੰਨ-ਤਿੰਨ ਖਿਡਾਰੀਆਂ ਦੀ ਸੂਚੀ ਸੌਂਪਣੀ ਹੈ।

ਰਿਪੋਰਟ ਮੁਤਾਬਿਕ ਲਖਨਊ ਫਰੈਂਚਾਇਜ਼ੀ ਨੇ ਕੇਐੱਲ ਰਾਹੁਲ, ਮਾਰਕਸ ਸਟੋਇਨਿਸ ਅਤੇ ਰਵੀ ਬਿਸ਼ਨੋਈ ਨੂੰ ਸਾਈਨ ਕਰਨ ਦਾ ਫੈਸਲਾ ਕੀਤਾ ਹੈ। ਮੈਗਾ ਨਿਲਾਮੀ 12 ਅਤੇ 13 ਫਰਵਰੀ ਨੂੰ ਬੈਂਗਲੁਰੂ ਵਿੱਚ ਹੋਣ ਦੀ ਸੰਭਾਵਨਾ ਹੈ। ਇੱਕ ਰਿਪੋਰਟ ਦੇ ਅਨੁਸਾਰ, ਕੇਐਲ ਰਾਹੁਲ ਨੂੰ ਫਰੈਂਚਾਇਜ਼ੀ ਦੁਆਰਾ ਨੰਬਰ 1 ਖਿਡਾਰੀ ਚੁਣਿਆ ਗਿਆ ਹੈ, ਇਸ ਲਈ ਉਨ੍ਹਾਂ ਨੂੰ ਨਿਰਧਾਰਤ ਫੀਸ ਸਲੈਬ ਦੇ ਅਨੁਸਾਰ 15 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਜਾਵੇਗਾ। ਆਸਟ੍ਰੇਲੀਆਈ ਆਲਰਾਊਂਡਰ ਸਟੋਇਨਿਸ ਨੂੰ ਪਲੇਅਰ 2 ਚੁਣਿਆ ਗਿਆ ਹੈ ਅਤੇ ਉਸ ਨੂੰ 11 ਕਰੋੜ ਰੁਪਏ ਮਿਲਣਗੇ। ਅਨਕੈਪਡ ਰਵੀ ਬਿਸ਼ਨੋਈ ਨੂੰ 4 ਕਰੋੜ ਰੁਪਏ ਮਿਲਣਗੇ, ਜਿਸ ਕਾਰਨ ਫਰੈਂਚਾਈਜ਼ੀ 60 ਕਰੋੜ ਰੁਪਏ ਦੇ ਬਕਾਇਆ ਪਰਸ ਨਾਲ ਮੈਗਾ ਨਿਲਾਮੀ ਵਿੱਚ ਸ਼ਾਮਿਲ ਹੋਵੇਗੀ।

ਰਾਹੁਲ ਦੇ ਲਖਨਊ ਫਰੈਂਚਾਇਜ਼ੀ ਨਾਲ ਜੁੜਨ ਨੂੰ ਲੈ ਕੇ ਕਾਫੀ ਅਟਕਲਾਂ ਲਗਾਈਆਂ ਜਾ ਰਹੀਆਂ ਸਨ। ਰਾਹੁਲ ਨੇ ਪਿਛਲੇ ਦੋ ਸੈਸ਼ਨਾਂ ਵਿੱਚ ਪੰਜਾਬ ਕਿੰਗਜ਼ (PBKS) ਦੀ ਅਗਵਾਈ ਕੀਤੀ ਸੀ। ਪਰ ਫਰੈਂਚਾਇਜ਼ੀ ਨੇ ਰਾਹੁਲ ਨੂੰ ਟੀਮ ਬਦਲਣ ਦੀ ਇੱਛਾ ਜ਼ਾਹਿਰ ਕਰਨ ਤੋਂ ਬਾਅਦ ਛੱਡ ਦਿੱਤਾ ਸੀ। ਕਿੰਗਜ਼ ਨੇ ਟੂਰਨਾਮੈਂਟ ‘ਚ ਪਿਛਲੇ ਚਾਰ ਸੀਜ਼ਨ ਛੇਵੇਂ ਸਥਾਨ ‘ਤੇ ਖਤਮ ਕੀਤੇ ਹਨ। ਹਾਲਾਂਕਿ, 2020 ਅਤੇ 2021 ਵਿੱਚ ਹੀ ਰਾਹੁਲ ਨੇ ਪੰਜਾਬ ਦੀ ਅਗਵਾਈ ਕੀਤੀ ਸੀ।

ਰਾਹੁਲ ਦੀ ਕਪਤਾਨੀ ਵਿੱਚ ਪੰਜਾਬ ਨੂੰ ਬਹੁਤੀ ਸਫਲਤਾ ਨਹੀਂ ਮਿਲੀ, ਪਰ ਉਹ ਲੀਗ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਖਿਡਾਰੀਆਂ ਵਿੱਚੋਂ ਇੱਕ ਰਹੇ ਹਨ। 2020 ਵਿੱਚ, ਰਾਹੁਲ ਨੇ ਸਭ ਤੋਂ ਵੱਧ ਦੌੜਾਂ ਬਣਾ ਕੇ ਔਰੇਂਜ ਕੈਪ ਹਾਸਿਲ ਕੀਤੀ, ਜਦੋਂ ਕਿ ਉਹ 2021 ਵਿੱਚ ਤੀਜੇ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ ਬਣੇ ਰਹੇ। ਕਰਨਾਟਕ ਵਿੱਚ ਜਨਮੇ, ਰਾਹੁਲ ਨੇ ਸਾਲ 2013 ਵਿੱਚ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ (ਆਰਸੀਬੀ) ਲਈ ਆਈਪੀਐਲ ਦੀ ਸ਼ੁਰੂਆਤ ਕੀਤੀ ਸੀ।

ਇਸ ਦੌਰਾਨ ਇਕ ਹੋਰ ਨਵੀਂ ਫਰੈਂਚਾਇਜ਼ੀ ਅਹਿਮਦਾਬਾਦ ਨੇ ਵੀ ਹਾਰਦਿਕ ਪਾਂਡਿਆ, ਰਾਸ਼ਿਦ ਖਾਨ ਅਤੇ ਸ਼ੁਭਮਨ ਗਿੱਲ ਨੂੰ ਸਾਈਨ ਕਰਨ ਦਾ ਐਲਾਨ ਕੀਤਾ ਸੀ। ਫਿਟਨੈਸ ਕਾਰਨਾਂ ਕਰਕੇ ਟੀਮ ਇੰਡੀਆ ਤੋਂ ਬਾਹਰ ਹੋਏ ਹਾਰਦਿਕ ਪਾਂਡਿਆਅਹਿਮਦਾਬਾਦ ਫਰੈਂਚਾਇਜ਼ੀ ਦੇ ਕਪਤਾਨ ਹੋਣਗੇ। ਹੁਣ ਸਾਰੀਆਂ ਦਸ ਟੀਮਾਂ ਦਾ ਧਿਆਨ ਆਗਾਮੀ ਆਈਪੀਐਲ ਨਿਲਾਮੀ ‘ਤੇ ਹੈ।