ਦੋ ਭਾਰਤੀਆਂ ਨੇ ਰਚਿਆ ਨਿਊਜ਼ੀਲੈਂਡ ਚੋਣਾਂ ਦੇ ਸਰਕਾਰੀ ਨਤੀਜਿਆਂ ‘ਚ ਇਤਿਹਾਸ

ਇਥੇ ਪਹਿਲੀ ਵਾਰ ਲੇਬਰ ਪਾਰਟੀ ਦੇ ਦੋ ਉਮੀਦਵਾਰ ਵੋਟਾਂ ਦੇ ਅਧਾਰ ਉਤੇ ਮੈਂਬਰ ਪਾਰਲੀਮੈਂਟ ਚੁਣੇ ਗਏ…

ਨਿਊਜ਼ੀਲੈਂਡ ਦੇ ਵਿਚ ਹਰ ਤਿੰਨ ਸਾਲ ਬਾਅਦ ਆਮ ਚੋਣਾਂ ਹੁੰਦੀਆਂ ਹਨ। 17 ਅਕਤੂਬਰ ਨੂੰ ਖਤਮ ਹੋਈਆਂ ਵੋਟਾਂ ਬਾਅਦ ਹੋਈ ਗਿਣਤੀ ਦੇ ਵਿਚ ਆਏ ਰੁਝਾਨੀ ਨਤੀਜਿਆਂ ਦੇ ਬਾਅਦ ਅਤੇ ਅੰਤਿਮ ਨਤੀਜੇ ਸਰਕਾਰੀ ਤੌਰ ‘ਤੇ ਘੋਸ਼ਿਤ ਕੀਤੇ ਗਏ। ਇਨ੍ਹਾਂ ਦੇ ਵਿਚ ਭਾਰਤੀਆਂ ਦੇ ਇਕ ਖਾਸ ਮਾਣ ਵਾਲੀ ਗੱਲ ਇਹ ਰਹੀ ਕਿ ਇਥੇ ਪਹਿਲੀ ਵਾਰ ਲੇਬਰ ਪਾਰਟੀ ਦੇ ਦੋ ਉਮੀਦਵਾਰ ਵੋਟਾਂ ਦੇ ਅਧਾਰ ਉਤੇ ਮੈਂਬਰ ਪਾਰਲੀਮੈਂਟ ਚੁਣੇ ਗਏ ਜਦ ਕਿ ਹੁਣ ਤੱਕ ਸਿਰਫ ਪਾਰਟੀ ਵੋਟ ਦੇ ਅਧਾਰ ਉਤੇ ਹੀ ਕਿਸਮਤ ਦੇ ਸਹਾਰੇ ਉਹ ਮੈਂਬਰ ਪਾਰਲੀਮੈਂਟ ਬਣਦੇ ਸਨ।

ਚੇਨਈ ਦੀ ਜੰਪਮਲ ਅਤੇ ਸਿੰਗਾਪੁਰ ਪੜ੍ਹੀਲਿਖੀ ਪ੍ਰਿਅੰਕਾ ਰਾਧਾਕ੍ਰਿਸ਼ਨਾ (41) 2017 ਦੀਆਂ ਆਮ ਚੋਣਾਂ ਦੇ ਵਿਚ ਲੇਬਰ ਪਾਰਟੀ ਦੀ ਲਿਸਟ ਐਮ. ਪੀ. ਵਜੋਂ ਸੰਸਦ ਦੇ ਵਿਚ ਆਪਣੀ ਥਾਂ ਬਨਾਉਣ ਵਿਚ ਕਾਮਯਾਬ ਹੋ ਗਈ ਸੀ। ਰਾਧਾਕ੍ਰਿਸ਼ਨਨ ਨੂੰ 2019 ਦੇ ਵਿਚ ਪਾਰਲੀਮੈਂਟਰੀ ਪ੍ਰਾਈਵੇਟ ਸੈਕਟਰੀ (ਏਥਨਿਕ ਅਫੇਅਰਜ਼) ਬਣਾਇਆ ਗਿਆ ਸੀ। ਪ੍ਰਿਅੰਕਾ ਰਾਧਾ ਕ੍ਰਿਸ਼ਨਨ ਨੂੰ ਇਸ ਵਾਰ ਕੁੱਲ 16232 ਵੋਟਾਂ ਪਈਆਂ ਜਦ ਕਿ ਉਨ੍ਹਾਂ ਦੇ ਹਲਕੇ ਮਾਉਂਗਾਕੇਕੀ ਤੋਂ ਨੈਸ਼ਨਲ ਪਾਰਟੀ ਦੇ ਉਮੀਦਵਾਰ ਡੇਨਿਸ ਲੀਅ ਨੂੰ 15597 ਵੋਟਾਂ ਪਈਆਂ। ਸੰਨ 2017 ਦੇ ਵਿਚ ਪ੍ਰਿਅੰਕਾ ਨੂੰ 12906 ਵੋਟਾਂ ਪਈਆਂ ਸਨ। ਖਾਸ ਗੱਲ ਇਸ ਵਾਰ ਇਹ ਹੈ ਕਿ ਪਹਿਲੀ ਵਾਰ ਕਿਸੀ ਭਾਰਤੀ ਮੂਲ ਦੀ ਸਾਂਸਦ ਨੂੰ ਮੰੰਤਰੀ ਪਦ ਲਈ ਚੁਣਿਆ ਗਿਆ ਹੈ।

ਰਾਧਾ ਕ੍ਰਿਸ਼ਨਨ ਦੇ ਕੋਲ ਤਿੰਨ ਮੰਤਰਾਲੇ ਰਹਿਣਗੇ ਜਿਨ੍ਹਾਂ ਵਿਚ ‘ਕਮਿਊਨਿਟੀ ਅਤੇ ਵਲੰਟੀਅਰ ਮੰਤਰਾਲਾ’, ‘ਡਾਇਵਰਸਿਟੀ-ਇਨਕਲੂਜ਼ਨ-ਏਥਨਿਕ ਮੰਤਰਾਲਾ’ ਅਤੇ ‘ਯੂਥ ਮੰਤਰਾਲਾ’ ਦਾ ਕਾਰਜ ਭਾਰ ਸੌਂਪਿਆ ਗਿਆ ਹੈ। ਇਸ ਤੋਂ ਇਲਾਵਾ ਉਹ ‘ਸ਼ੋਸਲ ਡਿਵੈਲਪਮੈਂਟ ਅਤੇ ਇੰਪਲਾਇਮੈਂਟ’ ਦੇ ਸਹਾਇਕ ਮੰਤਰੀ ਰਹਿਣਗੇ। ਵਰਨਣਯੋਗ ਹੈ ਕਿ  ਚੇਨਈ ਦੀ ਜੰਪਮਲ ਅਤੇ ਸਿੰਗਾਪੁਰ ਪੜ੍ਹੀ ਲਿਖੀ ਪ੍ਰਿਅੰਕਾ ਰਾਧਾਕ੍ਰਿਸ਼ਨਨ ਨੇ ਨਿਊਜ਼ੀਲੈਂਡ ਦੇ ਵਿਚ ਇਤਿਹਾਸ ਸਿਰਜ ਦਿੱਤਾ ਹੈ। ਅੱਜ 26 ਮੈਂਬਰੀ ਮੰਤਰੀ ਮੰਡਲ ਦੇ ਵਿਚ ਰਾਧਾ ਕ੍ਰਿਸ਼ਨਨ ਦੀ ਪੂਰੀ ਟੌਹਰ ਸੀ। ਪ੍ਰਧਾਨ ਮੰਤਰੀ ਮਾਣਯੋਗ ਸ੍ਰੀਮਤੀ ਜੈਸਿੰਡਾ ਅਰਡਨ ਨੇ ਅਗਲੇ ਤਿੰਨ ਸਾਲਾਂ ਲਈ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕੀ ਜਦ ਕਿ ਮੰਤਰੀ ਮੰਡਲ ਨੇ ਆਪਣੇ ਮੰਤਰਾਲੇ ਲਈ ਸਹੁੰ ਚੁਕੀ।